konnivartha.com; വൃശ്ചിക മാസത്തിലെ സാധാരണ തണുപ്പിനെ അപേക്ഷിച്ച് കാലാവസ്ഥയില്‍ വ്യതിയാനം .ഡിറ്റ് വാചുഴലിക്കാറ്റുമായി ബന്ധപ്പെട്ട് കാലാവസ്ഥയില്‍ വളരെയേറെ മാറ്റങ്ങള്‍ വന്നു . രണ്ടു ദിവസമായി കേരളത്തില്‍ മഞ്ഞും കനത്ത തണുപ്പും ആണ് . തണുപ്പിന് കാഠിന്യമേറി.
തെക്കു പടിഞ്ഞാറൻ ബംഗാൾ ഉൾക്കടലിനും വടക്കൻ ശ്രീലങ്കക്കും മുകളിലായി ഡിറ്റ് വാ ( Ditwah ) ചുഴലിക്കാറ്റ് സ്ഥിതിചെയ്യുന്നു. വടക്ക്–വടക്കു പടിഞ്ഞാറ് ദിശയിൽ സഞ്ചരിച്ച്, നവംബർ 30 രാവിലെയോടെ വടക്കൻ തമിഴ്നാട്–പുതുച്ചേരി, തെക്കൻ ആന്ധ്രാ പ്രദേശ് തീരത്തിന് സമീപമുള്ള തെക്കുപടിഞ്ഞാറൻ ബംഗാൾ ഉൾക്കടലിൽ എത്തിച്ചേരാൻ സാധ്യത.
ബംഗാൾ ഉൾക്കടലിൽ കൂടി വടക്ക്–വടക്കു പടിഞ്ഞാറ് ദിശയിൽ, ഡിറ്റ് വാ ചുഴലിക്കാറ്റ് നീങ്ങുമ്പോൾ തമിഴ്നാട് തീരത്തിൽ നിന്ന് കുറഞ്ഞത് യഥാക്രമം ഇന്ന് (29 നവംബർ) അർദ്ധരാത്രിയോടെ 60 കിലോമീറ്റർ, നാളെ (30 നവംബർ) രാവിലെ 50 കിലോമീറ്റർ, വൈകുന്നേരം 20 കിലോമിറ്റർ അകലെയായിരിക്കാൻ സാധ്യത.
അന്തരീക്ഷം മൂടിക്കെട്ടി നില്‍ക്കുന്നുണ്ടെങ്കിലും മഴ പെയ്യുന്നുമില്ല. ചുഴലിക്കാറ്റിന്റെ ഔട്ടര്‍ ബാന്‍റുകള്‍ക്ക് പുറത്താണ് കേരളം. കേരളത്തിലേക്ക് മേഘങ്ങള്‍ ചുഴലിക്കാറ്റ് അയക്കുന്നത് ഇന്നലെ മുതല്‍ ഉപഗ്രഹ ചിത്രങ്ങളില്‍ കാണാം. കനത്ത മേഘങ്ങള്‍ മൂലം സൂര്യപ്രകാശം ഭൂമിയില്‍ വീഴുന്നില്ല. ഇതു മൂലം ഭൂമി ചൂടായി അന്തരീക്ഷം ചൂടുപിടിക്കുന്നില്ല. ഇതിനാല്‍ പകലും രാത്രിയും താപനില കുറഞ്ഞു നില്‍ക്കുന്നു.
കൂടാതെ ചുഴലിക്കാറ്റും മറ്റു സിസ്റ്റങ്ങളും മേഖലയിലെ താപനില കുറയ്ക്കാറുണ്ട്. അതിന് പല കാരണങ്ങളുണ്ട്. ഉയര്‍ന്ന അന്തരീക്ഷ പാളികളിലെ തണുത്ത വായുവിനെ അപ്പര്‍ എയര്‍ സര്‍ക്കുലേഷനുകളും ചുഴലിക്കാറ്റുകളും ന്യൂനമര്‍ദങ്ങളും താഴേക്ക് കൊണ്ടുവന്നു ഭൗമോപരിതലത്തോട് സമ്പര്‍ക്കം പുലര്‍ത്തുന്ന താഴ്ന്ന അന്തരീക്ഷപാളിയെ തണുപ്പിക്കാറുണ്ട്. ഇതാണ് സിസ്റ്റം വരുമ്പോള്‍ അന്തരീക്ഷം പെട്ടെന്ന് തണുക്കുന്നതിന് മറ്റൊരു കാരണം.
ചുഴലിക്കാറ്റിന്റെ സ്‌പൈറല്‍ ബാന്‍ഡ് എന്നറിയപ്പെടുന്ന ഔട്ടര്‍ ബാന്‍ഡുകള്‍ ഈര്‍പ്പത്തെ കേരളത്തിനു മുകളിലേക്ക് എത്തിക്കുന്നതും തണുപ്പിന് കാരണമാണ്.
ഔട്ടര്‍ ബാന്‍റിലായതിനാലാണ് കേരളത്തില്‍ മഴ ലഭിക്കാത്തതിനും കാരണം. കൂടാതെ കേരളത്തിലേക്ക് ഉത്തരേന്ത്യന്‍ വരണ്ട കാറ്റിന്റെ സ്വാധീനവും ഉണ്ട്. എന്നാല്‍ കേരളത്തില്‍ കിഴക്കന്‍ മേഖലയിലും മറ്റും ഒറ്റപ്പെട്ട മഴക്ക് സാധ്യതയുണ്ട്.
