കോന്നി താലൂക്ക് ആശുപതിയില്‍ കൂടുതല്‍ കോവിഡ് പ്രതിരോധ സുരക്ഷാ മുന്‍കരുതല്‍ സ്വീകരിക്കണം: ആരോഗ്യ വകുപ്പ് മന്ത്രിയ്ക്കും പത്തനംതിട്ട ജില്ലാ കളക്ടര്‍ക്കും പരാതി നല്‍കി
കോന്നി വാര്‍ത്ത ഡോട്ട് കോം/ konnivartha.com : മലയോര മേഖലയായ കോന്നിയിലെ പ്രഥമ ചികില്‍സാ കേന്ദ്രമായ കോന്നി ബ്ലോക്ക് പഞ്ചായത്തിന്‍റെ കീഴിലുള്ള കോന്നി താലൂക്ക് ആശുപതിയില്‍ മറ്റ് രോഗങ്ങള്‍ക്ക് ചികില്‍സ തേടുന്നവര്‍ക്ക് മാരകമായ കോവിഡ് രോഗം പകരുന്നതായി ആരോഗ്യ വകുപ്പ് മന്ത്രിയ്ക്കും പത്തനംതിട്ട ജില്ലാ കളക്ടര്‍ക്കും കോവിഡ് രോഗിതന്നെ പരാതി നല്‍കി .
കോന്നി താലൂക്ക് ആശുപത്രിയില്‍ ഡോക്ടര്‍മാരുടെയോ , മറ്റ് ജീവനകാരുടെയോ ഭാഗത്ത് നിന്നും ചികില്‍സാ പിഴവുകള്‍ ഇല്ലെന്നും എന്നാല്‍ മറ്റ് ചികില്‍സയ്ക്ക് വേണ്ടി കിടത്തി ചികില്‍സ വേണ്ടി വന്ന രോഗിയ്ക്കും മറ്റ് കൂട്ടിരുപ്പ്കാര്‍ക്കും കുടുംബത്തിലെ 5 വയസ്സുള്ള കുഞ്ഞിനും അനേക ആളുകള്‍ക്കും കോവിഡ് സ്ഥിരീകരിച്ച സംഭവം സമഗ്രമായി അന്വേഷിക്കണം എന്നാണ് പരാതിയിലെ ആവശ്യം . കോന്നി താലൂക്ക് ആശുപത്രിയില്‍ കോവിഡ് രോഗം പകരാതിരിക്കാന്‍ ഉള്ള സുരക്ഷാ മുന്‍ കരുതല്‍ കാര്യമായി ഇല്ലാത്തത് ആണ് കാരണമായി പരാതിയില്‍ ചൂണ്ടി കാണിച്ചിരിക്കുന്നത് . ഈ കുടുംബത്തെ കൂടാതെ മറ്റ് 4 കുടുംബത്തിലെ ആളുകള്‍ ഇവിടെ മറ്റ് രോഗത്തിന് ചികില്‍സ തേടിയിരുന്നു .അവര്‍ക്കും കോവിഡ് ബാധയേറ്റ്ഇപ്പോള്‍ പത്തനംതിട്ട ജനറല്‍ ആശുപത്രിയില്‍ ചികില്‍സയിലാണ് . പ്രായമായ രണ്ടു ആളുകള്‍ ഐ സി യുവില്‍ ആണ് .
കോന്നി താലൂക്ക് ആശുപത്രിയില്‍ പ്രാഥമിക രോഗങ്ങള്‍ക്ക് ചികില്‍സ തേടുന്നവര്‍ക്ക് മതിയായ സുരക്ഷ ഒരുക്കുവാന്‍ അടിയന്തിര നടപടികള്‍ വേണം എന്നു ഇവിടെ നിന്നും കോവിഡ് ബാധിച്ചു എന്നു സംശയിക്കുന്നയാള്‍ ആരോഗ്യ വകുപ്പ് മന്ത്രിയ്ക്ക് പരാതി നല്‍കി .
ഇവിടെ നിന്നും കോവിഡ് രോഗം പകരാനുള്ള സാധ്യത ഉണ്ടോ എന്നുള്ള കാര്യത്തില്‍ സമഗ്ര അന്വേഷണം ആരോഗ്യ വകുപ്പ് ഭാഗത്ത് നിന്നും ഉടന്‍ ഉണ്ടാകണം . സ്ഥല പരിമിതി മൂലം കോവിഡ് പ്രതിരോധ കുത്തിവെപ്പ് സമീപ സ്കൂളിലേക്ക് മാറ്റിയിരുന്നു .