കോന്നി -അച്ചൻകോവിൽ റോഡ് ഉന്നത നിലവാരത്തിൽ വികസിപ്പിക്കും അഡ്വ. കെ യു ജനീഷ് കുമാർ എംഎൽഎ.
konnivartha.com : കോന്നി -അച്ചൻകോവിൽ റോഡ് ഉന്നത നിലവാരത്തിൽ വികസിപ്പിക്കുമെന്ന് അഡ്വ. കെ യു ജനീഷ് കുമാർ എംഎൽഎ പറഞ്ഞു.വനത്തിൽ കൂടെയുള്ള റോഡ് വീതി വർധിപ്പിക്കുന്നതിന്റെ ഭാഗമായി വനംവകുപ്പിന്റെ അനുമതി വാങ്ങുന്നതിനുള്ള ജി പി എസ് സർവേ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
കോന്നി അച്ഛൻകോവിൽ റോഡിൽ കല്ലേലി മുതൽ അച്ചൻകോവിൽ വരെ വനത്തിൽ കൂടി കടന്നു പോകുന്ന ഭാഗത്തിന് നിലവിൽ മൂന്നര മീറ്റർ ടാറിങ് ആണ് ഉള്ളത്. നിലവിലുള്ള റോഡ് 10 മീറ്റർ വീതിയിലാണ് ആധുനിക നിലവാരത്തിൽ ബി.എം.ബി.സി സാങ്കേതികവിദ്യയിൽ വികസിപ്പിക്കുന്നത്. കേരള റോഡ് ഫണ്ട് ബോർഡിനാണ് നിർമ്മാണ ചുമതല.ഇതിനായി വനഭൂമി ഏറ്റെടുക്കുന്നതിന്റെ ജി.പി. എസ്,ടോട്ടൽ സ്റ്റേഷൻ സർവ്വേയാണ് നടക്കുന്നത്.
10 മീറ്റർ വീതിയിൽ റോഡ് നിർമ്മിക്കുമ്പോൾ വനത്തിൽ നിന്ന് എത്ര ഭൂമി വേണം എന്നത് തിട്ടപ്പെടുത്തുന്നതിനാണ് സർവ്വേ നടത്തുന്നത്. ഇവിടെ നഷ്ടപ്പെടുന്ന വനഭൂമിക്ക് പകരം ഭൂമി നൽകി വനവൽക്കരണം നടത്തും.വ്യവസായ വകുപ്പിന്റെ കീഴിലുള്ള സ്വയംഭരണ സ്ഥാപനമായ തിരുവനന്തപുരം സെന്റർ ഫോർ മാനേജ്മെന്റ് ഡെവലപ്മെന്റ്സ്‌ (സി. എം. ഡി )ആണ് സർവ്വേ ചെയ്യുന്നത്.
ഒരാഴ്ച കൊണ്ട് സർവ്വേ നടപടികൾ പൂർത്തീകരിക്കും.പത്തുദിവസത്തിനകം കെ ആർ എഫ് ബിക്ക് റിപ്പോർട്ട് സമർപ്പിക്കും. കോന്നിയിലെ പ്രധാനപ്പെട്ട ശബരിമല തീർഥാടക പാതയാണ് കോന്നി അച്ചൻകോവിൽ റോഡ്. കൂട്ടു മുക്കു മുതൽ കല്ലേലി വരെ 15.88 കിലോമീറ്റർ റോഡിൻ്റെ തുടക്കത്തിലുള്ള പോയിൻ്റും അവസാനപോയിൻ്റും GPS എസ്റ്റാബ്ലിഷു ചെയ്തു.
ടോട്ടൽ സ്റ്റേഷൻ ഉപയോഗിച്ചു 30 മീറ്റർ ഇടവിട്ട് റോഡിൻ്റെ സെൻട്രൽ ലൈനും, ഇരുവശവും പോയിൻ്റു അടയാളം ചെയ്ത് കുറ്റിയടിക്കുന്ന പ്രവർത്തികൾ നടന്നുവരികയാണ്. തിരുവനന്തപുരം അജിലിറ്റാസ് സർവ്വേ ഏജൻസിയാണ് സി എം ഡി യിൽ നിന്നും സർവ്വേയുടെ കരാർ ഏറ്റെടുത്തിരിക്കുന്നത്. വനത്തിനുള്ളിലൂടെയുള്ള സർവ്വേ നടപടികൾക്ക് ഉദ്യോഗസ്ഥർക്ക് സഹായവുമായി വനപാലകരുടെ സേവനവും ഉറപ്പുവരുത്തും.
അഡ്വ.കെ.യൂ ജനീഷ് കുമാർ എംഎൽഎ യോടൊപ്പം അരുവാപ്പുലം ഗ്രാമപഞ്ചായത്ത് പ്രസിഡണ്ട് രേഷ്മ മറിയം റോയ്,ജില്ലാ പഞ്ചായത്ത് അംഗം ജിജോ മോഡി, പഞ്ചായത്ത് അംഗങ്ങളായ വി കെ രഘു ജോജു വർഗീസ്, സിന്ധു സന്തോഷ് , കെ ആർ എഫ് ബി അസി. എൻജിനീയർ ഫിലിപ്പ്, പൊതുമരാമത്ത് നിരത്ത് വിഭാഗം അസി എൻജിനീയർ രൂപക്ക് ജോൺ ,സി എം ഡി സർവ്വേ ഏജൻസി ഉദ്യോഗസ്ഥർ തുടങ്ങിയവർ പങ്കെടുത്തു.
