konnivartha.com: എം എൽ എ ഫണ്ടിൽ നിന്നും തുക അനുവദിച്ചു നവീകരിച്ച ഏനാദിമംഗലം ഗ്രാമപഞ്ചായത്ത് ഓഫീസ് ഉദ്ഘാടനം ജൂലൈ 14 തിങ്കളാഴ്ച വൈകിട്ട് 5 മണിക്ക് തദ്ദേശസ്വയംഭരണ വകുപ്പ് മന്ത്രി എം ബി രാജേഷ് നിർവഹിക്കുമെന്ന് അഡ്വ. കെ യു ജനീഷ് കുമാർ എം എൽ എ അറിയിച്ചു.
സ്‌ഥലപരിമിതിമൂലം വീർപ്പുമുട്ടിയിരുന്ന ഏനാദിമംഗലം പഞ്ചായത്ത് ഓഫിസിന്റെ പ്രവർത്തനം പുതിയ നിർമ്മാണം പൂർത്തികരിച്ചതോടെ സുഗമമായി പ്രവർത്തിക്കും.
കോന്നി നിയോജക മണ്ഡലം ആസ്തി വികസന പദ്ധതി 2023-24 പ്രകാരം 65 ലക്ഷം രൂപ ചിലവിൽ 3700 ചതുരശ്ര അടിയിൽ നിർമ്മിച്ച കെട്ടിടത്തിൽ കോൺഫറൻസ് ഹാൾ, സ്റ്റാൻഡിങ് കമ്മിറ്റി ഓഫീസ്,പഞ്ചായത്ത് അംഗങ്ങൾക്ക് ഇരിക്കുന്നത്തിനുള്ള മുറികൾ, LSGD അസി. എഞ്ചിനീയർ ഓഫീസ്, വില്ലേജ് എക്സ്റ്റൻഷൻ ഓഫീസ്, തൊഴിലുറപ്പ് പദ്ധതി ഓഫീസ്,കുടുംബശ്രീ ഓഫീസ് എന്നിവയാണ് ക്രമീകരിച്ചിരിക്കുന്നത്.
നവീകരിച്ച പഞ്ചായത്ത് ഓഫീസ് ഉദ്ഘാടനത്തിനൊപ്പം ആധുനിക നിലവാരത്തിൽ നിർമ്മിക്കുന്ന മങ്ങാട് കുന്നിട ചെളിക്കുഴി റോഡ് , 3.3 5 കോടി രൂപ അനുവദിച്ച് ആധുനികരീതിയിൽ നിർമ്മിക്കുന്ന പുത്തൻചന്ത- തേപ്പുപാറ റോഡ്
എന്നിവയുടെ നിർമ്മാണ ഉദ്ഘാടനം പൊതുമരാമത്ത് ടൂറിസം വകുപ്പ് മന്ത്രി അഡ്വ. പി എ മുഹമ്മദ് റിയാസ് ഓൺലൈനായി നിർവഹിക്കും.
നിലവിലുള്ള 3.5 വീതിയുള്ള റോഡ് 5.5 മീറ്റർ വീതിയിൽ ബിഎംബിസി സാങ്കേതികവിദ്യയിലാണ് നിർമ്മിക്കുന്നത്. ആവശ്യമായ സ്ഥലങ്ങളിൽ സംരക്ഷണഭിത്തിയും ഓടയും ഐറിഷ് ഓടയും ട്രാഫിക് സേഫ്റ്റി പ്രവർത്തികളും നിർമ്മാണത്തിൽ ഉൾപ്പെടുത്തിയിട്ടുണ്ട്. ഇടുക്കി ആസ്ഥാനമായുള്ള കരാർ കമ്പനിയാണ് പ്രവർത്തി ഏറ്റെടുത്തിരിക്കുന്നത്. പൊതുമരാമത്ത് നിരത്ത് വിഭാഗമാണ് നിർവഹണ ഏജൻസി.
നിലവിൽ പുതുവൽ മുതൽ കുന്നിട വരെയുള്ള റോഡിന്റെ നിർമ്മാണ പ്രവർത്തി 5 കോടി രൂപ അനുവദിച്ച് പ്രവർത്തി പുരോഗമിക്കുകയാണ്.
റോഡ് പ്രവർത്തികൾ പൂർത്തീകരിക്കുന്നതോടെ ഏനാധിമംഗലം പഞ്ചായത്തിലെ എല്ലാ പൊതുമരാമത്ത് റോഡുകളും ബിഎംബിസി നിലവാരത്തിലേക്ക് മാറ്റപ്പെടും.
വാടക കെട്ടിടത്തിൽ പ്രവർത്തിക്കുന്ന ഏനാധിമംഗലം വില്ലേജ് ഓഫീസിന് 44 ലക്ഷം രൂപ അനുവദിച്ച് പുതിയതായി നിർമ്മിക്കുന്ന ഏനാദിമംഗലം സ്മാർട്ട് വില്ലേജ് ഓഫീസ് നിർമ്മാണം ഉദ്ഘാടനം റവന്യൂ വകുപ്പ് മന്ത്രി കെ രാജൻ നിർവഹിക്കും.
ഇളമണ്ണൂരിനും മരുതിമൂടിനും ഇടയ്ക്ക് കെ പി റോഡ് സമീപമുള്ള 60 സെന്റ് റവന്യൂ ഭൂമിയിലാണ് വില്ലേജ് ഓഫീസ് നിർമ്മിക്കുന്നത്. സംസ്ഥാന നിർമ്മിതി കേന്ദ്രത്തിനാണ് പ്രവർത്തിയുടെ നിർവഹണ ചുമതല.
സംസ്ഥാന സർക്കാർ ഒരു കോടി രൂപ അനുവദിച്ച് അംബേദ്കർ ഗ്രാമ വികസന പ്രവർത്തി നടപ്പിലാക്കുന്ന കണ്ണങ്കര ചെമ്മണ്ണേറ്റം കോളനിയിലെ വികസന പ്രവർത്തികൾ പട്ടികജാതി പട്ടികവർഗ്ഗ ക്ഷേമ വകുപ്പ് മന്ത്രി ഒ ആർ.കേളു ഓൺലൈനായി നിർവഹിക്കും.
പ്രവർത്തിയിലൂടെ വീടുകളുടെ അറ്റകുറ്റപ്പണികൾ, ഗ്രാമീണ വഴികളുടെ നിർമ്മാണ പ്രവർത്തികൾ, സംരക്ഷണഭിത്തി നിർമ്മാണം എന്നിവ നടപ്പിലാക്കും.
ജില്ലാ നിർമ്മിതി കേന്ദ്രമാണ് പ്രവർത്തിയുടെ നിർവഹണ ഏജൻസി.
എംഎൽഎ ഫണ്ടിൽ നിന്നും 15 ലക്ഷം രൂപ അനുവദിച്ച നിർമ്മാണം പൂർത്തീകരിച്ച ഏനാധിമംഗലം സി എച്ച് സി -മാരൂർ റോഡിന്റെ ഉദ്ഘാടനവും
20 ലക്ഷം രൂപ വീതം അനുവദിച്ച് നിർമ്മിക്കുന്ന ഗ്രാമീണ റോഡ് പ്രവർത്തികളായ വേടമല- കുന്നിട റോഡ്, തോട്ടപ്പാലം- കണ്ണങ്കര റോഡ് എന്നിവയുടെ നിർമ്മാണ ഉദ്ഘാടനവും തദ്ദേശ സ്വയംഭരണ വകുപ്പ് മന്ത്രി നിർവഹിക്കും. ഗ്രാമപഞ്ചായത്ത് എൻജിനീയറിങ് വിഭാഗത്തിനാണ് പ്രവർത്തിയുടെ നിർവഹണ ചുമതല.
2025 ജൂലൈ 14 തിങ്കൾ വൈകിട്ട് അഞ്ചുമണിക്ക് ഇളമണ്ണൂർ ചാങ്കൂർ അമ്പലം ജംഗ്ഷനിൽ നടക്കുന്ന ചടങ്ങിൽ അഡ്വ. കെ യു ജനീഷ് കുമാർ എം എൽ എ അധ്യക്ഷനാകും.
തദ്ദേശ സ്വയംഭരണ വകുപ്പ് മന്ത്രി എം ബി രാജേഷ് പൊതുയോഗം ഉദ്ഘാടനം ചെയ്യും.
മന്ത്രിമാരായ മുഹമ്മദ് റിയാസ്, കെ രാജൻ, ഒ ആർ കേളു എന്നിവർ വിവിധ പ്രവർത്തികൾ ഓൺലൈനായി നിർമ്മാണ ഉദ്ഘാടനം ചെയ്യും.
ഏനാധിമംഗലം ഗ്രാമപഞ്ചായത്ത് പ്രസിഡണ്ട് സാം വാഴോട് ചടങ്ങിൽ സ്വാഗതം ആശംസിക്കും.
ആന്റോ ആന്റണി എംപി, ജില്ലാ പഞ്ചായത്ത് പ്രസിഡണ്ട് ജോർജ് എബ്രഹാം,ജില്ലാ കളക്ടർ പ്രേംകൃഷ്ണൻ,
ത്രിതല പഞ്ചായത്ത് ജനപ്രതിനിധികൾ , രാഷ്ട്രീയ പാർട്ടി പ്രതിനിധികൾ, സാമൂഹ്യ സാംസ്കാരിക രംഗത്തെ പ്രമുഖർ തുടങ്ങിയവർ പങ്കെടുക്കുന്ന ചടങ്ങിൽ വൈകിട്ട് ആറുമണി മുതൽ സുപ്രസിദ്ധ ഗായിക പ്രസീത ചാലക്കുടിയും സംഘവും അവതരിപ്പിക്കുന്ന ഗാനമേളയും ഉണ്ടാകും.
അഡ്വ.ആർ ബി രാജീവ് കുമാർ കൺവീനറായും പി രാജഗോപാലൻ നായർ ചെയർമാനുമായുള്ള സംഘാടകസമിതിയാണ് പ്രവർത്തിക്കുന്നത്.