ശബരിമല തീര്‍ഥാടനം :കല്ലേലി അച്ചന്‍കോവില്‍ കാനന പാത സഞ്ചാരയോഗ്യമാക്കണം : കല്ലേലികാവ് ഭരണ സമിതി നിവേദനം നല്‍കി
konnivartha.com; : ശബരിമല തീര്‍ഥാടനകാലം അടുത്തിരിക്കെ അയ്യപ്പന്മാര്‍ കാല്‍നടയായി എത്തുന്ന പരമ്പരാഗത അച്ചന്‍കോവില്‍ കല്ലേലി കാനന പാത അടിയന്തിരമായി സഞ്ചാരയോഗ്യമാക്കണം എന്ന് ആവശ്യം ഉന്നയിച്ച് കല്ലേലി ഊരാളി അപ്പൂപ്പന്‍ കാവ് ഭരണ സമിതി വനം വകുപ്പ് മന്ത്രിയ്ക്കും എന്‍ സി പി(എസ് ) നേതൃത്വത്തിനും നിവേദനം നല്‍കി .
വനം വകുപ്പിന്‍റെ കല്ലേലി കാവല്‍പ്പുര മുതല്‍ കല്ലേലികാവിനു മുന്നിലൂടെ ഉള്ള അച്ചന്‍കോവില്‍ കോട്ടവാസല്‍ ചെങ്കോട്ട കാനന പാതയുടെ കല്ലേലി ചെക്ക് പോസ്റ്റ്‌ മുതല്‍ വര്‍ഷങ്ങളായി അറ്റകുറ്റപണികള്‍ നടക്കുന്നില്ല . റോഡിന്‍റെ ഇരു ഭാഗവും വലിയ കുഴികള്‍ ആണ് .വാഹനങ്ങള്‍ വളരെ ബുദ്ധിമുട്ടിയാണ് കടന്നു പോകുന്നത് .നിത്യവും അപകട മേഖലയാണ് . റോഡിലെ ഇരു ഭാഗത്തെയും കുഴികള്‍ മണ്ണിട്ട്‌ നികത്താന്‍ പോലും അധികൃതര്‍ക്ക് കഴിഞ്ഞിട്ടില്ല .
തമിഴ്നാട് കുറ്റാലത്തുനിന്ന് ചെങ്കോട്ട, മേക്കര, കോട്ടവാസൽ, അച്ചൻകോവിൽ, ആവണിപ്പാറ,മണ്ണാറപ്പാറ, കുടമുക്ക്, കടിയാർ,നടുവത്തുമൂഴി, കല്ലേലി, അരുവാപ്പുലം വഴി കോന്നി എലിയറക്കൽ എത്തുന്ന പരമ്പരാഗത റോഡാണ് അറ്റകുറ്റപണികള്‍ ഇല്ലാതെ കുഴിയായി കിടക്കുന്നത് . ഏതാനും വര്‍ഷം മുന്നേ ചില സ്ഥലങ്ങളില്‍ ടാറിംഗ് നടത്തി .എന്നാല്‍ വീതി കൂട്ടിയില്ല . അച്ചൻകോവിലിൽനിന്ന് പ്ലാപ്പള്ളി വരെയുള്ള 100 കിലോമീറ്റർ കെ.എസ്.ടി.പി പദ്ധതിയിൽ ഉൾപ്പെടുത്തി സഞ്ചാരയോഗ്യമാക്കാൻ പദ്ധതി തയാറാക്കിയിരുന്നു .അതിനായി 100 കോടിയും അനുവദിച്ചിരുന്നു.എന്നാല്‍ കല്ലേലി അച്ചന്‍കോവില്‍ കാനന പാതയില്‍ ഒരു നിര്‍മ്മാണവും നടന്നിട്ടില്ല .
ശബരിമല തീര്‍ഥാടകര്‍ കാല്‍നടയായി കടന്നു വരുന്ന കല്ലേലി അച്ചന്‍കോവില്‍ കാനന പാത നിലവില്‍ കാല്‍നടയാത്രയ്ക്ക് പോലും സഞ്ചാരയോഗ്യമല്ല .കാല്‍ നടയായി എത്തുന്ന അന്യ സംസ്ഥാന അയ്യപ്പന്മാരുടെ പ്രധാന കാനന ഇടത്താവളം ആണ് കല്ലേലി ഊരാളി അപ്പൂപ്പന്‍ കാവ് .
വര്‍ഷങ്ങളായി അറ്റകുറ്റപണികള്‍ ഇല്ല . പിറവന്തൂർ, അരുവാപ്പുലം പഞ്ചായത്ത് മേഖലയാണ് ഈ വന പാത . ചെങ്കോട്ടയിൽനിന്ന് വരുന്ന ശബരിമല തീർഥാടകർക്ക് കിലോമീറ്ററുകൾ ലാഭിച്ച് കോന്നിവഴി പമ്പയിൽ എത്താൻ ഉപകരിക്കുന്നതാണ് പാത.അച്ചന്‍കോവില്‍ ,കോന്നി വനം ഡിവിഷനുകളുടെ കീഴില്‍ വരുന്ന ഈ കാനന പാതയുടെ അറ്റകുറ്റപണികള്‍ അടിയന്തിരമായി ചെയ്തു സഞ്ചാരയോഗ്യമാക്കണം എന്ന് ആവശ്യം ഉന്നയിച്ചാണ് കല്ലേലി ഊരാളി അപ്പൂപ്പന്‍ കാവ് ഭരണ സമിതി പ്രസിഡന്റ് അഡ്വ സി വി ശാന്തകുമാറിന്‍റെ നേതൃത്വത്തില്‍ വനം വകുപ്പ് മന്ത്രിയ്ക്കും എന്‍ സി പി സംസ്ഥാന ജനറല്‍സെക്രട്ടറി മാത്യൂസ്‌ ജോര്‍ജിനും നിവേദനം നല്‍കിയത് .
റോഡിലെ ഇരു ഭാഗവും വീതി കൂട്ടി കുറ്റമറ്റതാക്കാനും കല്ലേലി ചെക്ക് പോസ്റ്റ്‌ മുതല്‍ ഉള്ള കാനന പാത ടാറിംഗ് നടത്തി സഞ്ചാരയോഗ്യമാക്കണമെന്നും വര്‍ഷങ്ങളായുള്ള ആവശ്യം ആണ് . വിഷയത്തില്‍ അനുഭാവപൂര്‍വ്വമായ നിലപാടുകള്‍ വനം വകുപ്പ് ഭാഗത്ത്‌ നിന്നും ഉണ്ടാകുമെന്ന് എന്‍ സി പി നേതൃത്വം കല്ലേലിക്കാവ് ഭരണ സമിതിയ്ക്ക് ഉറപ്പു നല്‍കി .
