ചടയമംഗലത്ത് ഹെല്‍മെറ്റില്ലാതെ ബൈക്കിന് പിറകില്‍ യാത്ര ചെയ്തതിന് വയോധികന്റെ കരണത്തടിച്ച എസ്‌ഐയെ സ്ഥലം മാറ്റി. ചടയമംഗലം പ്രൊബേഷണല്‍ എസ്.ഐ. ഷജീമിന് കുട്ടിക്കാനം കെഎപി 5 ബറ്റാലിയനിലേക്ക് കഠിനപരിശീലനത്തിന് മാറ്റി.അന്വേഷണത്തിന് ശേഷം തുടര്‍നടപടിയുണ്ടാകും.ചടയമംഗലം സ്വദേശി രാമാനന്ദന്‍ നായരും സുഹൃത്തും ജോലിക്ക് പോകുന്നതിനിടെയാണ് പോലീസ് ഇവരുടെ ബൈക്ക് കൈക്കാണിച്ച് നിര്‍ത്തിയത്.ബൈക്കോടിച്ചിരുന്ന സുഹൃത്തും പിറകിലിരുന്ന രാമാനന്ദന്‍ നായരും ഹെല്‍മെറ്റ് ധരിച്ചിരുന്നില്ല. തുടര്‍ന്ന് ആയിരം രൂപ പിഴയടയ്ക്കാന്‍ പോലീസ് ആവശ്യപ്പെട്ടു. ജോലിക്ക് പോവുകയാണെന്നും കൈയില്‍ പണമില്ലെന്നും ഇരുവരും പറഞ്ഞെങ്കിലും എസ്.ഐ. ഷജീം ഇവരെ വിട്ടയച്ചില്ല. സ്റ്റേഷനില്‍ ചെന്ന് പിന്നീട് പിഴ അടക്കാമെന്ന് പറഞ്ഞിട്ടും അതിനും അനുവദിച്ചില്ല. പ്രൊബേഷണല്‍ എസ്.ഐ. ഷജീം വയോധികനെ വലിച്ചിഴച്ച് ജീപ്പില്‍ കയറ്റുകയും കരണത്തടിക്കുകയും ചെയ്തു . സംഭവം ഒരാള്‍ മൊബെലില്‍ എടുത്ത് സമൂഹ മാധ്യമങ്ങളില്‍ പ്രസിദ്ധീകരിച്ചു . സംഭവം വിവാദമായതോടെയാണ് എസ്‌ഐയ്ക്കു എതിരെ നടപടി ഉണ്ടായത് .