KONNIVARTHA.COM : കല്ലാര്‍ നദിയുടെ ഉത്ഭവം തേടിയുള്ള പഠനം പൂര്‍ത്തിയായി . കോന്നി കല്ലേലി വയക്കര നിവാസിയും എം ജി യൂണിവേഴ്സിറ്റി പരിസ്ഥിതി ഗവേഷണ വിദ്യാര്‍ത്ഥിയുമായ അരുൺ ശശി. എസ്സാണ് കല്ലാറിനെ കുറിച്ചുള്ള പഠനം നടത്തിയത് .
കോന്നി, റാന്നി വന ഡിവിഷനുകളിൽ ഉൾപ്പെട്ട കോന്നി, ഗൂഡാരക്കൽ എന്നീ റിസർവ് വനങ്ങളുടെ അതിർത്തി പങ്കിടുന്ന വളഞ്ഞകെട്ടി, മൈലകല്ല്, കടമമാൻകുന്ന് എന്നീ മലനിരകളിൽ നിന്നുമാണ് പമ്പയുടെ പോഷക നദിയായ കല്ലാർ ഉത്ഭവിക്കുന്നത്. പമ്പാ – കല്ലാറിന് തെക്ക് കിഴക്കായി അച്ചൻകോവിലാറിന്റ്റെ പോഷകനദിയായ അച്ചൻകോവിൽ – കല്ലാർ കടന്നു പോകുന്നു. അച്ചൻകോവിൽ- കല്ലാറിന്റ്റെ വൃഷ്ടി പ്രദേശങ്ങൾ തമിഴകവുമായി അതിർത്തി പങ്കിടുമ്പോൾ പമ്പാ – കല്ലാറിന്റ്റെ വൃഷ്ടി പ്രദേശങ്ങളെല്ലാം തന്നെ കേരളത്തിനുള്ളിലായാണ് സ്ഥിതി ചെയ്യുന്നത്.
അറമ്പമുരുപ്പ് (822 മി), ചെളിക്കൽകാര് (997 മി), പുന്നമേട് (551 മി), പൊങ്ങാമ്പാറ (574 മി), കൊപ്പമുരുപ്പ് എന്നീ മലനിരകൾ പമ്പാ – കല്ലാർ, അച്ചൻകോവിൽ – കല്ലാർ എന്നിവയുടെ വൃഷ്ടി പ്രദേശങ്ങളെ തമ്മിൽ വേർതിരിക്കുന്നു. അരുവാപ്പുലം, തണ്ണിത്തോട്, മലയാലപ്പുഴ, കോന്നി, മൈലപ്ര എന്നീ പഞ്ചായത്തുകളിലൂടെ കടന്ന് പോകുന്ന പമ്പാ-കല്ലാർ വടശ്ശേരിക്കരയിൽ വച്ച് പമ്പാ നദിയുമായി കൂടി ചേരുന്നു.
286.0352 ച. കി. മി വിസ്തൃതിയുള്ള പമ്പ-കല്ലാർ നീർത്തടത്തിനു ആകെ 19 ഉപ നീർത്തടങ്ങങ്ങളാണുള്ളത്. ഈ ഉപ നീർത്തടങ്ങങ്ങളിൽ കല്ലാറിനു ഏറ്റവും കൂടുതൽ ജലം പ്രദാനം ചെയ്യുന്ന ഉപ നീർത്തടങ്ങളെല്ലാം തന്നെ മുണ്ടോൻമൂഴിക്ക് വടക്ക് കിഴക്കായും, തെക്ക് കിഴക്കായുമുള്ള പ്രദേശങ്ങളിലായി വ്യാപിച്ചു കിടക്കുന്നു. ഉത്ഭവ സ്ഥാനമായ കിഴക്കൻ മലനിരകൾ മുതൽ മുണ്ടോൻമൂഴി വരെ കല്ലാറിനു 14 ഉപ നീർത്തടങ്ങളാണുള്ളത്. 222.3926 ച.കി. മിയാണ് ഈ നീർത്തടങ്ങളുടെ ആകെ വിസ്തൃതി.
മുണ്ടോൻമൂഴി വരെ വ്യാപിച്ചു കിടക്കുന്ന നീർത്തടങ്ങളിൽ അഞ്ചു എണ്ണം വടക്ക് കിഴക്കായും (86.7974 ച .കി.മി ) ഒൻപത് എണ്ണം തെക്ക് കിഴക്കായും (135.5952 ച .കി.മി) സ്ഥിതി ചെയ്യുന്നു. തേക്കുതോട്, തണ്ണിത്തോട് എന്നീ ഗ്രാമങ്ങൾ കല്ലാറിന്റ്റെ വടക്കൻ വൃഷ്ടി പ്രദേശങ്ങളിലും മണ്ണീറ, അതുമ്പുകളും എന്നീ ഗ്രാമങ്ങൾ കല്ലാറിന്റ്റെ തെക്കൻ വൃഷ്ടി പ്രദേശങ്ങളിലുമാണ് സ്ഥിതി ചെയ്യുന്നത്.
കല്ലാര്‍ അതിന്‍റെ പ്രധാന കൈവഴികൾ ചെളിക്കലാർ, വാക്കല്ലാർ എന്നിവയാണ്. സമുദ്ര നിരപ്പിൽ നിന്നും 179 മി. ഉയരത്തിൽ വച്ച് ഈ രണ്ടു കൈവഴികളും തമ്മിൽ കൂടി ചേരുന്നു. ഇവിടം മുതലാണ് കല്ലാർ എന്ന പേരിൽ അറിയപ്പെടുന്നത്. കല്ലാറിനു ഏറ്റവും കൂടുതൽ ജലം പ്രധാനം ചെയ്യുന്ന നീർത്തടം ചെളിക്കലാണ്. 22.0395 ച.കി.മിയാണ് ഈ നീർത്തടത്തിന്റ്റെ വിസ്തൃതി. ഈ നീർത്തടത്തിന്റ്റെ ഭാഗമായ ചെളിക്കലാറാണ് കല്ലാറിന്റ്റെ ഏറ്റവും നീളം കൂടിയ കൈവഴി. ചെളിക്കൽകാരിനു വടക്ക് കിഴക്കായി ഗൂഡാരക്കൽ റിസർവ് വനത്തിലൂടെ ഒഴുകുന്ന ചിന്ന കക്കിയാറിന്റെ വൃഷ്ടി പ്രദേശങ്ങളുമായി അതിർത്തി പങ്കിടുന്ന ഗൂഡാരക്കൽ മലനിരകളിലെ കരടിമുടിയുടെ പടിഞ്ഞാറൻ ഭാഗത്തു നിന്നുമാണ് ചെളിക്കലാർ ഉത്ഭവിക്കുന്നത്. ഈ മലനിരകളിൽ ഉൾപ്പെട്ട കടമാൻകുന്നാണ് (1442 മീറ്റർ) കല്ലാർ നീർത്തടത്തിലെ ഏറ്റവും ഉയർന്ന പ്രദേശം.
ചെളിക്കലാറിന്റ്റെ ഒരു കൈവഴി അഴുതയെന്നപേരിലാണ് അറിയപ്പെടുന്നത്.
ചെളിക്കലാറിന്റ്റെ വടക്ക് കിഴക്കായി മാളികകല്ലു മലനിരകളിൽ ഉത്ഭവിക്കുന്ന അഴുതയാറും അഴുതയാറിനു തെക്ക് പടിഞ്ഞാറായി ഒഴുകുന്ന മേട്ടുപാറ തോടും ചെളിക്കലാറിനു വടക്കായി കൂടി ചേരുന്നു. അഴുതയാറും മേട്ടുപാറ തോടും കൂടി ചേർന്നൊഴുകുന്ന കൈവഴി കലവരയാർ എന്ന പേരിലാണ് അറിയപ്പെടുന്നത്. ചെളിക്കലാറിനു സമാന്തരമായി ഒഴുകുന്ന ഈ കൈവഴി പിന്നീടു ചെളിക്കലാറിൽ ലയിക്കുന്നു. മഞ്ഞാർ മലയിൽ (1015 മീറ്റർ) നിന്നും ഉത്ഭവിക്കുന്ന മഞ്ഞാർ ചെളിക്കലാറിന്റ്റെ മറ്റൊരു പ്രധാന കൈവഴിയാണ്. മഞ്ഞാർ ഉപ നീർത്തടം വാക്കല്ലാർ, ചെളിക്കലാർ എന്നീ ഉപ നീർത്തടങ്ങളെ തമ്മിൽ വേർതിരിക്കുന്നു. വാക്കല്ലാർ, ചെളിക്കലാർ എന്നിവയുടെ സംഗമ സ്ഥാനത്തിനു മുൻപായി. മഞ്ഞാർ ചെളിക്കലാറുമായി കൂടി ചേരുന്നു. മഞ്ഞാർ മലയിൽ നിന്നും ഉത്ഭവിക്കുന്ന ചാലുകൾ വാക്കല്ലാറിനും ധാരാളം ജലം പ്രധാനം ചെയ്യുന്നു. വടക്ക് ദിശയിൽ നിന്നും ഒഴുകിയെത്തുന്ന ചിന്നാർ, നന്ദനയാർ എന്നിവയാണ് വാക്കല്ലാറിന്റ്റെ പ്രധാന കൈവഴികൾ.
കല്ലാറിനു തെക്ക് ഭാഗത്തു നിന്നും ഉത്ഭവിക്കുന്ന മണ്ണീറ, മുണ്ടോമൂഴി, കൊപ്പമുരുപ്പു – നരകേനരുവി നീർത്തടങ്ങൾ കല്ലാറിനു കൂടുതൽ ജലം പ്രധാനം ചെയ്യുന്നവയാണ്. ചെളിക്കൽകാര് (997 മി) പമ്പ-കല്ലാർ, അച്ചൻകോവിൽ നീർത്തടങ്ങളെ തമ്മിൽ വേർതിരിക്കുന്നു. അരുവാപ്പുലം പഞ്ചായത്തിൽ ഉൾപ്പെട്ട കോട്ടംപാറയുടെ വടക്കായുള്ള പ്രദേശങ്ങൾ കല്ലാറിന്റ്റെ നരകേനരുവി ഉപ നീർത്തടത്തിന്റ്റെ ഭാഗമാണ്. മണ്ണീറ ഉപ നീർത്തടത്തിലെ ഉയർന്ന പ്രദേശങ്ങൾ മടത്തുമൺ മുരുപ്പ് (419മീ), മണ്ണീറ മുരുപ്പ് (417 മീ) എന്നിവയാണ് ഇവിടെ നിന്നും ഉത്ഭവിക്കുന്ന നീർച്ചാലുകൾ മുണ്ടോൻമൂഴി തോട്ടിലൂടെ കല്ലാറ്റിൽ എത്തിച്ചേരുന്നു.
കുട്ടവഞ്ചി സവാരിക്ക് പ്രശസ്തമായ കല്ലാറ്റിലെ മുണ്ടോൻമൂഴിക്ക് കിഴക്കായി കല്ലാറിനു സമീപത്തായാണ് 1875 ൽ തിരുവിതാംകൂറിൽ ആദ്യമായി ഖേദ്ദാ (വേലികെട്ടി) സംബ്രദായത്തിൽ ആനപിടുത്തം ആരംഭിച്ചത്. നിലവിൽ കുട്ടവഞ്ചി സവാരി നടത്തുന്ന സ്ഥലത്തിന് സമീപത്തായി അക്കാലത്തു ഒരു പ്ലാൻറ്റേഷൻ ബംഗ്ളാവും ആനകളെ പരിശീലിപ്പിക്കുന്നതിനായി ആനക്കൂടും ഉണ്ടായിരുന്നു. അപ്പുപ്പൻ തോടിനു വടക്കു കിഴക്കായി അച്ചൻകോവിൽ, പമ്പ – കല്ലാർ നീർത്തടങ്ങളെ തമ്മിൽ വേർതിരിക്കുന്ന പൊങ്ങൻപാറ മലനിരകളിൽ വനം വകുപ്പിന്റ്റെ മേൽനോട്ടത്തിലുള്ള ഏലതോട്ടം പ്രവർത്തിച്ചിരുന്നു. മുണ്ടോൻമൂഴിയിലെ പോലെ ഒരു ബംഗ്ളാവ് പൊങ്ങൻപാറയിയിൽ വനം വകുപ്പ് പണികഴിപ്പിച്ചിരുന്നു.
ഏലം ശേഖരണ സമയത്തു തൊഴിലാളികൾക്ക് വസിക്കുന്നതിനുള്ള സംവിധാനവും ഇവിടെ ഉണ്ടായിരുന്നു. തിരുവിതാംകൂർ വനം വകുപ്പിന്റ്റെ ഉടമസ്ഥതയിലുള്ള ആദ്യ ഏല തോട്ടത്തിനു 1869 ൽ തുടക്കം കുറിച്ചതും കല്ലാറിന്റ്റെ വൃഷ്ടി പ്രദേശങ്ങളിലാണ്. കൊട്ടാരത്തിൽ ശങ്കുണ്ണിയുടെ ഐതീഹ്യമാലയിൽ മുണ്ടോൻമൂഴിയെപറ്റിയും കൊപ്പം ഉപായയോഗിച്ചുള്ള ആനപിടുത്തത്തെയും പറ്റി വിവരിച്ചിട്ടുണ്ട്.
1898-1905 കാലഘട്ടത്തിൽ ഇന്ത്യയുടെ വൈസ്രോയി ആയിരുന്ന ജോർജ്ജ് നഥാനിയേൽ കഴ്സണിന്റ്റെ ‘ആൽബം ഓഫ് സൗത്ത് ഇന്ത്യൻ വ്യൂസ്’ എന്ന ആൽബത്തിലെ 76 പ്രിന്റുകളിൽ രണ്ടെണ്ണം കല്ലാർ നദിയുടെ ദൃശ്യങ്ങളാണ്. ഗവൺമെന്റ് ഫോട്ടോഗ്രാഫറായ സക്കറിയാസ് ഡിക്രൂസ് 1900- ലാണ് ഇവ ചിത്രീകരിച്ചത്. ബ്രിട്ടീഷ് ലൈബ്രറിയുടെ ഓൺലൈൻ ഗ്യാലറിയിൽ ഈ ചിത്രങ്ങൾ ലഭ്യമാണ്.